हरिवन–पूर्व पश्चिम राजमार्ग अन्तरगत हरिवन स्थित कडरिया चोकमा भएको मोटरसाइकल दुर्घटनामा ४ जना घाइते भएका छन् ।
आइतबार साँझ हरिवन नगरपालिका–११, स्थित कडरिया चोकमा नारायण चोकतर्फ जाँदै गरेको बा ३९ प ४६२६ नम्बरको मोटरसाइकलले विपरित दिशाबाट आँउदै गरेको ना ८ प ७६६८ नम्बरको मोटरसाइकललाई ठक्कर दिएको हो । दुर्घटनामा ७६६८ नम्बरको मोटरसाइकलका चालक हरिवन नगरपालिका ११, बस्ने २१ वर्षका राजाराम ठाकुर, उनी सँगै मोटरसाइकलमा सवार २१ वर्षका सुमन अधिकारी, ४६२६ नम्बरको मोटरसाइकलका चालक हरिवन नगरपालिका–८, बस्ने ३० वर्षका अर्जुन खत्री र उनकी छोरी १० वर्षकी अस्निया खत्री घाइते भएका छन ।
उनीहरूको हात, खुट्टाको घुँडा, टाउको र मुखमा चोट लागेको अवस्थामा हरिवन स्थित नमुना अस्पतालमा उपचार भइरहेको प्रहरीले जनाएको हो । घटनामा संलग्न दुवै मोटरसाइकल इलाका प्रहरी कार्यालय हरिवनको नियन्त्रणमा रहेको जिल्ला प्रहरीका प्रवक्ता प्रहरी नायब उपरीक्षक दीपक श्रेष्ठले जानकारी दिए ।
