लालबन्दी–सर्लाहीको लालबन्दीमा मेरो माइक्रो फाइनान्स लघुवित्त वित्तीय संस्था लिमिटेडको आयोजनामा रक्तदान शिविर सम्पन्न भएको छ ।
शाखा कार्यालयको १२ औं वार्षिकोत्सवको अवसरमा आयोजना गरेको रक्तदान शिविरमा ४० जनाले रगत दान गरेका आयोजकले जनाएको हो । नेपाल रेडक्रस सोसाइटी सँगको समन्वयमा संस्थाले खुला रक्तदान शिविर आयोजना गरेको थियो ।
लालबन्दी नगरपालिकाका प्रमुख वासुदेव अधिकारीको प्रमुख अतिथ्यतामा शिविरको औपचारिक कार्यक्रम सम्पन्न गरिएको शाखा प्रमुख तथा कार्यक्रमका सभाध्यक्ष समीर घिमिरेले जानकारी दिनुभयो ।
संस्थाको प्राङ्गणमा सम्पन्न कार्यक्रममा मेरो माइक्रो फाइनान्सका प्रदेश प्रमुख रामकिशोर प्रसाद कुशवाहा लगायतको आतिथ्यता रहेको थियो । आयोजकले वार्षिकोत्सवलाई सामाजिक सेवामार्फत अर्थपूर्ण बनाउने उद्देश्यले रक्तदान कार्यक्रम आयोजना गरेको जनाएको छ ।
