राजु तामाङ, बागमती–सर्लाहीको बागमतीमा जारी प्रथम जिरायत कप जिल्ला स्तरीय फुटबल प्रतियोगिता अन्तरगत आजको खेलमा आयोजक (बि) र समृद्ध जुअवा कोल्हवी विजयी भएको छ ।
बुधबार बागमती नगरपालिका–४, ॐ युवा क्लबको खेल मैदानमा भएको पहिलो खेलमा आयोजक बागमती बि ३–२ गोल अन्तरले विजयी भएको हो । ट्राइबेकरमा ॐ शान्ति युवा क्लब हरिवन–६, लाई पराजित गर्दै आयोजक बि अन्तिम चारमा प्रवेश गरेको हो । निर्धारित समयमा दुवै टोलीले गोलरहित बराबरी खेले पनि ट्राइबेकरबाट खेलको निर्णय लिइएको थियो ।
खेलको म्यान अफ दि म्याच आयोजक बि का एरिक मगर घोषित भए ।
यस्तै दोस्रो खेलमा आइडियल कोएड लालबन्दीलाई ट्राइबेकरमै ४–२ गोल अन्तरले पराजित गर्दै समृद्ध युवा क्लब जुअवा कोल्हवी बारा विजयी भएको छ । निर्धारित समयमा दुवै टोलीले १–१ गोलको बराबरी खेले पछि खेल ट्राइबेकरमा धकेलिएको थियो । ट्राइबेकरमा समृद्ध युवा क्लब जुअवा कोल्हवी बारा भाग्यमानी सावित भयो ।
यस खेलको म्यान अफ दि म्याच समृद्ध युवा क्लब जुअवा कोल्हवी बाराका गोल रक्षक उनेश चौधरी घोषित भए ।
यस्तै बिहीबारको पहिलो खेलमा महाकाली युवा क्लब लालबन्दी र सुनौलो युवा क्लब राजघाट तथा दोस्रो खेलमा नमस्ते युवा क्लब हरिवन र श्री महाविर जनता माध्यामिक विद्यालय हरिपुर बिच प्रतिस्पर्धा हुने आयोजकले जनाएको छ । पहिलो खेल दिउसो १ बजे र दोस्रो दिउसो ३ बजेबाट सुरु हुने छ ।
मंसिर २० गते फाइनल हुने खेलको विजेता टोलीले नगद ५० हजार ५१ रुपैयाँ सहित प्रथम जिरायत कप, मेडल र प्रमाणपत्र तथा उपविजेता टोलीले नगद २५ हजार ५१ रुपैयाँ शिल्ड मेडल र प्रमाणपत्र प्राप्त गर्ने क्लबका अध्यक्ष जित बहादुर विश्वकर्माले जानकारी दिए ।
‘‘राष्ट्रका लागि खेलकुद, स्वास्थ्यको लागि खेलकुद’’ भन्ने नारा सहित स्थानीय स्तरमा खेल क्षेत्रको विकास तथा खेलाडीको प्रोत्साहनको उद्देश्य सहित प्रतियोगिता आयोजना गरिएको क्लबले जनाएका हो ।
