लालबन्दी– दर्शकमाझ निकै लोकप्रिय बनिरहेको चलचित्र ‘पूर्णबहादुरको सारंगी’का नायक विजय बराललाई गृहनगर लालबन्दीमा भव्य स्वागत गरिएको छ ।
शनिवार आफू अभिनीत चलचित्र प्रदर्शन हलहरू भ्रमण तथा दर्शक भेटघाटका क्रममा गृहनगर लालबन्दी आइपुगेका बराललाई स्थानीय तथा दर्शकहरूले भव्य स्वागत गरेका हुन् । इभेन्ट सिनेमाज लालबन्दीमा चलचित्र प्रदर्शन भइरहेको अवस्थामा उपस्थित नायक बराललाई दर्शकहरूले हुटिङ सहित माया दर्शाएका थिए ।
नायक बराल केही बेर हलमा दर्शकहरू सँग भेटघाट र फोटो सेसन पछि लालबन्दीमै आयोजित केही औपचारिक कार्यक्रममा सहभागी भएर फर्किएका थिए । बरालको मुख्य भूमिका रहेको नेपाली कथानक चलचित्र ‘पूर्णबहादुरको सारङ्गी’ यति बेला देश भरीका चलचित्रहलहरुमा निकै लोकप्रियताका साथ प्रदर्शन भइरहेको छ ।
यस चलचित्रले नेपाली चलचित्र इतिहासमा नयाँ कीर्तिमानी कायम गरिरहँदा बरालको गृहनगर लालबन्दीका गाउ बस्तीमा समेत खुसियाली छाएको छ । बरालको लोकप्रियताले गृहनगर तथा जिल्लावासी भएको समेत गर्भ लागेको पूर्व शिक्षक समेत रहेका सर्लाहीको गैर निवासी रजनीकान्त झाले प्रतिकृया दिए ।
यसैबीच ‘पूर्णबहादुरको सारङ्गी’ मार्फत कुशल कलाकार तथा चर्चित नायकको उपमा लिएर गृहनगर आइपुगेका बराललाई विभिन्न सङ्घ संस्थाहरूले समेत सम्मान गरेका छन् । बरालले उच्च शिक्षा हासिल गरेको जनज्योति माध्यामिक विद्यालय तथा क्याम्पसका पूर्व विद्यार्थी समाजले समेत उहाँलाई सम्मान सहित मायाको चिनो प्रदान गरेको रोशन बोहराले बताए ।
लालबन्दी जेसिजले समेत नायक बराललाई कदरपत्र तथा दोसल्ला ओढाएर सम्मान गरेको जनाएको छ ।
