ईश्वरपुर–सर्लाहीको ईश्वरपुरमा कार सहित पोखरीमा खसेका दुई जना बेपत्ता भएका छन् ।
ईश्वरपुर नगरपालिका–२, मियाँखोर भन्ने स्थानमा मंगलबार बिहान झिसमिसेमा बयलवासबाट महोत्तरीको गौशला जाँदै गरेको लु २ च ६७५८ नम्बरको कार अनियन्त्रित भई स्थित पोखरीमा पसेको हो । दुर्घटनामा परेको कार सहित कारमा सवार महोत्तरीको गौशला नगरपालिका–१०, बस्ने ३८ वर्षका सुरेश महतो र सोनवा गाउँपालिका–८, बस्ने अन्दाजी ३७ वर्षका रामाकान्त ठाकुर पोखरीमा डुबेर बेपत्ता भएका जिल्ला प्रहरी कार्यालय सर्लाहीका प्रहरी नायब उपरीक्षक दीपक श्रेष्ठले जानकारी दिए ।
यस्तै सोही कारमा सवार महोत्तरीको गौशला नगरपालिका–२, बस्ने अन्दाजी ३१ वर्षका जनक यादव पौडिएर बाहिर निस्किएका प्रहरीले जनाएको छ । घटना लगतै खोजी तथा उद्धारको लागि पुगेको प्रहरी टोलीले बर्दिवास स्थित सशस्त्र प्रहरी बल नेपाल नं.२ छिन्नमस्ता बाहिनीबाट गोताखोर टोली समेत बोलाएर बेपत्ता भएका दुई जनाको खोजी गरिरहेको जिल्ला प्रहरी नायब उपरीक्षक श्रेष्ठले बताए ।
दुर्घटनामा परेको कार सडक छेउमा रहेको सरस्वती उच्च माध्यामिक विद्यालयको पोखरीमा डुबेको छ । घटनाको विषयमा थप अनुसन्धान भइरहेको प्रहरीले जनाएको हो ।
