ईश्वरपुर–सर्लाहीको ईश्वरपुर नगरपालिका–१३, निवासी पुराना कलाकार तथा बामपन्थी नेता मोति बहादुर पाख्रिनको निधन भएको छ ।
लामो समय देखि टिभी तथा मिर्गौला रोगबाट पीडित पाख्रिनको ६७ वर्षको उमेरमा आज निधन भएको हो । नेकपा माओवादी केन्द्र ईश्वरपुर नगरपालिका–१३, का वडा कमिटी अध्यक्ष समेत रहेका पाख्रिनको पार्थिव शरीरमा पार्टीका मधेस प्रदेश इन्चार्ज लिलामणि पोख्रेलले पार्टीको झण्डा ओढाएर अन्तिम श्रद्धाञ्जली अर्पण गरे ।
पार्टीका पुराना नेताहरू प्रल्हाद बुढाथोकी, अच्युतम प्रसाद काफ्ले, दीप बहादुर योन्जन, कमल बुढाथोकी लगायतका नेता कार्यकर्ताहरूले समेत अन्तिम श्रद्धाञ्जली अर्पण गरेका थिए । इन्द्रेणी सांस्कृतिक समाजका पुराना कलाकार समेत रहनु भएका पाख्रिन कम्युनिस्ट आन्दोलनका एक सफल योद्धा तथा जनकलाकार रहेको हरिवन नगरपालिकाका मेयर रमेश बुढाथोकी (कमल) ले स्मरण गरे ।
गीत सङ्गीतको माध्यमबाट जनतामा क्रान्तिको विगुल फुक्ने पाख्रिनको निधनले पार्टीलाई अपुरणीय क्षति पुगेको पार्टीका पुराना कलाकार अम्मर मङ्गोलियनकाे भनाई छ ।
