लालबन्दी–सर्लाहीको लालबन्दी नगरपालिका स्थित नवलपुरमा विद्युत सर्टभई आगलागी भएको छ ।
मङ्गलबार राती लालबन्दी नगरपालिका–१, नवलपुर निवासी शङ्कर थपलियाको ईट्टा र जस्ताले बनेको घरमा आगलागी भएको हो । विद्युत सर्ट भएर लागेको आगोले घरको माथिल्लो तल्लामा राखेको अन्नपात, लत्ता कपडा, फ्रिज लगायतका सामाग्री जलेर नष्ट भएको जिल्ला प्रहरीका प्रवक्ता एवं डीएसपी दीपक श्रेष्ठले जानकारी दिनुभयो ।
आगलागीबाट एक लाख ५० हजार मूल्य बराबरको क्षति भएको प्रहरीले जनाएको छ । आगो स्थानीय, नेपाल प्रहरी, सशस्त्र प्रहरी र हरिवन नगरपालिकाबाट गएको बारुणयन्त्रको सहयोगमा नियन्त्रणमा आएको थियो । आगो समयमै नियन्त्रणमा आएकोले अन्य मानवीय तथा पशु चौपाया क्षति हुन नपाएको प्रहरीले जनाएको हो ।
