मलंगवा–मानव बेचबिखन बिरुद्धको राष्ट्रिय दिवसको अवसरमा सर्लाही सदरमुकाम मलंगवामा प्रभात फेरी र कोणसभा सम्पन्न गरिएको छ ।
बुधवार विभिन्न संघ संगठनको सम्यूक्त आयोजनामा दिवसको अवसरमा सदरमुकाम मलंगवामा प्रभात फेरी निकालिएको जिल्ला प्रशासन कार्यलय सर्लाहीले जनाएको हो । जिल्ला प्रशासन कार्यलय अगाडिबाट निस्किएको र्याली नगर परिक्रमा गरी जिल्ला अदालत अगाडि पुगेर कोणसभामा परिणत भएको थियो ।
कोणसभालाई सम्बोधन गर्दै जिल्ला समन्वय समिति प्रमुख कौशल किशोर सिंहले मानव बेचबिखन न्युनिकरणको लागि समाजमा बिद्यमान सामाजिक न्याय र आर्थिक सशक्तिकरण प्रभावकारी बनाउनु पर्नेमा जोड दिए । समाजमा गहिरिदै गएको आर्थिक संकट, चरम गरिवी तथा अशिक्षा र अज्ञानता मानव बेचबिखनको पहिलो कारण बन्नेको अधिकांश बक्ताहरुको धारणा थियो ।
सम्बोधनकै क्रममा मानव बेचबिखन जस्तो जघन्य अपराध नियन्त्रण आजको अपरिहार्यता भएको प्रमुख जिल्ला अधिकारी ईन्द्रदेव यादवले बताए । यो न्युनिकरणको लागि समाजका सबै तह र तप्काले जिम्मेवार बन्नुपर्नेमा उन्ले जोड दिए । गत ६ महिनामा सर्लाहीको बाटोहुदै मानव बेचबिखन तथा तस्करी हुदै गरेको अवस्थामा माईती नेपालले ६६ जनालाई उद्धार गरेको तथ्याङ सार्वजनिक गरेका थिए ।
यस्तै गत आर्थिक बर्षमा नेपाल प्रहरीले भारतमा बेचिएका दुई महिलाको उद्वार गरेको जनाएको थियो । उक्त घटनामा संलग्नलाई पक्राउ गरी पुर्पक्षको लागि थुनामा पठाएको जिल्ला प्रहरी कार्यलय सर्लाहीले उल्लेख गरेको हो । सभालाई नागरिक समाजका अगुवा शिवचन्द्र चौधरी, महिला अधिकारकर्मी बनिता कार्की, माईती नेपालका प्रतिनिधि लगाएतले सम्बोधन गरेका थिए ।
मलंगवा नगरपालिका, नेपाल प्रहरी, सशस्त्र प्रहरी, मानव अधिकार आयोग, इन्सेक, लगाएत संघ संस्था र कार्यलयको आयोजनामा कार्यक्रम सम्पन्न भएको प्रमुख जिल्ला अधिकारी यादवले जानकारी दिए । ‘‘सामाजिक न्याय र आर्थिक सशक्तीकरण : मानव बेचबिखन निर्मुलन’’ भन्ने नारा सहित यसबर्षको मानव बेचबिखन बिरुद्धको दिवस सर्लाही सहित देशैभरी मनाईएको हो ।
