मलंगवा – सर्लाहीमा निजामती सेवा दिवसको अवसर पारेर कर्मचारी र जनप्रतिनिधि विच मैत्रीपुर्ण फुटवल प्रतियोगिता सम्पन्न गरिएको छ ।
बिहिवार सदरमुकाम मलंगवा नगरपालिका स्थित कवडहलमा मैत्रीपुर्ण फुटवल प्रतियोगिता सम्पन्न गरिएको हो । नेपालमा हरेक बर्ष भदौ २२ गते निजामती सेवा दिवस मनाउने गरिएको छ । यस बर्षको निजामती सेवा दिवसको नारा ”व्यवसायीक र सृजनशिल प्रशासन : विकास, समृद्धि र सुशासन” तय गरिएको छ ।
दिवसको पुर्व सन्ध्यामा सम्पन्न प्रतियोगितामा कर्मचारी टिमले जनप्रतिनिधि टिमलाई ८–२ गोल अन्तरले पराजित गरेका थिए । प्रतियोगिताको लागि जनप्रतिनिधिको टोली जिल्ला समन्वय समितिका सभापति कौशल किशोर सिंहको नेतृत्वमा मैदानमा उत्रीएका थिए ।
यस्तै निजामती कर्मचारीको टोली प्रमुख जिल्ला अधिकारी इन्द्रदेव यादवको नेतृत्वमा मैदान उत्रीएको कर्मचारी मिलन केन्द्रका अध्यक्ष एवं नापी कार्यलय सर्लाहीका प्रमुख नापी अधिकृत संजय मानन्धरले जानकारी दिए । टोलीमा सहायक प्रमुख जिल्ला अधिकारी होम प्रसाद घिमिरे, नेपाल प्रहरीका एसपी नरेशराज सुवेदी लगाएत सहभागी थिए ।
यस प्रकारको खेलले जिल्लामा जनप्रतिनिधि र निजामती कर्मचारी विचको सम्बन्ध मित्रवत रहने तथा सुमधुर सम्बन्ध कायम गर्न मद्धत पुग्ने अपेक्षा गरिएको आयोजकको भनाई छ । खेलमा फुटवल प्रशिक्षक अर्जुन चौधरीले रेफ्रिको भुमिका निर्वाह गरेका थिए । भने, नागरिक समाजका अगुवा शिवचन्द्र चौधरीको कमेन्ट्रीले खेललाई थप रोमान्चक बनाएको सहभागिहरुको भनाई छ ।
यस्तै निजामती सेवा दिवस–२०८० को मुख्य दिन शुक्रवार सदरमुकाम मलंगवामा प्रभातफेरी, रक्तदान, वृक्षारोपण र सेवा निवृत भएका निजामती कर्मचारीलाई सम्मान तथा विदाई कार्यक्रम राखिएको कर्मचारी मिलन केन्द्रका संयोजक मानन्धरले जानकारी दिए । यसै दिवसको अवसरमा लालबन्दीमा रक्तदान कार्यक्रम तथा आश्रममा खाध्यन्न वितरण सम्पन्न गरिएको थियो ।
कार्यक्रम निजामती कर्मचारीहरुको आधिकारीक ट्रेड युनियन, सर्लाही र कर्मचारी मिलन केन्द्र सर्लाहीको सम्युक्त आयोजनामा सम्पन्न भएको हो ।
