अंग्रेजी नयाँ बर्ष अर्थात १ जनवरीको अवसरमा सर्लाहीको बागमती नगरपालिका स्थित भरत ताल पर्यटकले भरिभराउ भएका छन् ।
आईतवार अंग्रेजी नयाँ बर्ष मनाउन आएका बाह्य तथा आन्तरीक पर्यटकले भरत ताल क्षेत्र भरिभराउ भएको हो । पर्यटकहरु ताल र आसपासका खालिठाउँमा बसेर आफन्त, साथिभाईहरु सगँ विभिन्न परिकारका साथ रमाई रहेका देखिन्थे । अन्य समयमा समेत पर्यटकको चहल पहल रहने भरत तालमा आईतवार अत्यधिक घुईचो देखिएको हो ।
निर्माणकै चरणमा रहेको यस ताल बागमती–४ र १२ नम्बर वडामा गरी १२१ बिगाह क्षेत्र फलमा फैलिएको छ । तालमा एक मिनि कु्रज सहित ३० भन्दा धेरै मोटरबोटले पर्यटकहरुलाई जलसयर गराएर मनोरन्जन प्रदान गरिरहेका छन् । आईतवार ताल घुम्न सबैभन्दा धेरै भारतको बिहार राज्यका पर्यटक आएका मोटरबोट ब्यवसायी संघका अध्यक्ष गौतम खड्काले जानकारी दिए ।
ताल घुम्न आउनेको संख्या हजारौँ रहेको स्थानीय ब्यवसायीहरुको भनाई छ । समुन्द्रको जस्तै मज्जा दिने भएकोले भरत ताल नेपालमा मात्र नभई भारतमा समेत प्रख्यात रहेको पर्यटकहरुको भनाई थियो । ५६ करोड लागत लागिसकेको यस तालमा संचालन भएको मोटरबोटबाट मात्र बागमती नगरपालिकाले बार्षिक २ करोड बढि राजस्व संकलन गरिरहेको नगरपालिकाका प्रमुख प्रशासकिय अधिकृत विमल प्रसाद पोखरेलले बताए ।
नुनथर क्षेत्रमा पिकनिक खान आउने भरिभराउँ
यस्तै अंग्रेजी नयाँ बर्षको अवसरमा सर्लाही, रौतहट, मक्वानपुर र सिन्धुलीको संगम नुनथर क्षेत्रमा समेत आईतवार पिकनिक खान आउने पर्यटकको घुईचो देखिएको छ । नयाँ बर्ष मनाउन आएका पर्यटक सवार गाडिका कारण राती अवेर सम्म बागमती र नुनथर क्षेत्रमा ट्राफिक अस्तवेस्त बनेको थियो ।
सुनसान नाढी मैनतालमा समेत पर्यटकको चहलपहल
नयाँ बर्षको अवसरमा जिल्लाको चन्द्रनगरमा रहेको ऐतिहासिक नाढी मैन तालमा समेत पर्यटकको चहलपहल देखिएको थियो ।
अन्य समयमा सुनसान प्राय देखिने नाढी मैन ताल हिजो केही चहलपहलमय देखिएको स्थानीय ब्यवसायी रामनरेष चौधरीले बताए ।
पुर्व पश्चिम राजमार्गबाट ७ किलोमिटरको दुरीमा रहेको यसताल प्रचारप्रसार तथा सहज सडक सुविधा नभएकै कारण ओझेलमा परेको जानकारहरुको भनाई छ । केही बर्ष पहिला नेपाली सेनाले तालको सरसफाई गरिदिएको थियो । सोही समयमा सेनाले आसपासमा निर्माण गरेको भौतिक संरचना संरक्षण अभावमा नष्ट भईसकेको छ ।
यस्तै नयाँ बर्ष मनाउने पर्यटकले आईतवार हरिवन नगरपालिका स्थित कैलाशपुरी, ईश्वरपुरको सागरनाथ, लालबन्दीको पत्थरकोट, बरहथवाको मुक्तेश्वर लगाएतको क्षेत्र समेत भरिभराउ देखिए । नयाँ बर्ष तथा विभिन्न अवसरका पिकनिक खान तथा घुम्न जाने प्रचलन पछिल्लो समय बढ्दै गएको छ । यसरी छिमेकी देश भारतबाट घुम्न आउने पर्यटकले लिएर आएको सवारीको भन्सार शुल्कबाट समेत आईतवार राम्रै राजस्व संकलन भएको जिल्ला भन्सार कार्यलयले जनाएको छ ।
पछिल्लो केही बर्ष यता भारतको बिहार सरकारले मदिरा निषेध गरेका कारण विभिन्न अवसरमा मदिरा पिउनकै लागि धेरै भारतिय पर्यटक नेपाल आउने गरेका पाहिएका छन् ।
