हरिपुर्वा–सर्लाहीको हरिपूर्वामा प्रहरीले हवाई फायर गरेको छ । छोरा मारेको भन्दै भाईको परिवारमाथि आक्रमण प्रयास भएपछि घटना नियन्त्रणमा लिन प्रहरीले तिन राउण्ड हवाई फाएर गरेको हो ।
शुक्रवार साझ हरिपुर्वा नगरपालिका–५, निवासी भरत राय परिवारले गणेशी राय परिवारमाथि आक्रमण गरेको जिल्ला प्रहरी कार्यलय सर्लाहीले जनाएको छ । ६÷७ महिना पहिला झुण्डीको अवस्थामा छोरा मनोज राय फेला परेको घटनालाई लिएर भरत राय परिवार र स्थानीयले गणेशी रायको परिवार माथि आक्रमण गरेका थिए । सम्बन्धान भरत र गणेशी सहोदर दाजु भई हुन् ।
दाजु भरत रायको परिवारले छोरा मनोजलाई गणेशी राय र उनको परिवारले हत्या गरेको आरोप लगाउदै आईरहेका थिए । उनीहरुले प्रहरीमा किटानी जाहेरी समेत दिएका र प्रहरीले घटनाको अनुसन्धान समेत गरिरहेको थियो । त्यस यता गणेशी राय र उनको श्रीमती बाहिर बस्दै आएको श्रोतले जनाएको छ । शुक्रवार छठपर्व मनाउन आएको बेला उनीहरु विच झगडा भएको स्थानीयको भनाई छ ।
सोही क्रममा जम्मा भएका स्थानीय समेत मिलेर गणेशी रायको परिवार माथि आक्रमण गरेका प्रहरीले जनाएको हो । लगतै घटना स्थल पुगेको प्रहरी टोलीले हवाई फाएर गरेर स्थिती नियन्त्रणमा लिएको हो । ठुलो संख्यमा घटना स्थलमा जम्मा भएको अराजक भिड नियन्त्रणमा लिन हवाई फायर गर्नु परेको सर्लाही प्रहरीका एसपी प्रविण पोखरेलले जानकारी दिए ।
घटना भएको खवरपाएपछि गणेशीको परिवारलाई उद्धार गर्न पुगेको प्रहरी टोली माथिनै उनीहरुले ढुंगामुढा गरेका प्रहरीले जनाएको हो । प्रत्यक्षदर्शीका अनुसार भरत राय परिवारको कुटपिटबाट गणेशी रायका छोरा अन्दाजी १८÷२० बर्षका रोहित राय घाईते भएका छन् । उनको लालबन्दी स्थित मोडेल अस्पतालमा उपचार भईरहेको छ ।
यस्तै सोही घटनामा घाईते भएकी भरत रायकी श्रीमती फुलो देवीको पनि प्रादेशिक अस्पताल मलंगवामा उपचार भईरहेको छ । घटनास्थलमा थप मद्धतका लागि नेपाल प्रहरी र सशस्त्र प्रहरीको टोली परिचालन गरिएको प्रमुख जिल्ला अधिकारी थानेश्वर गौतमले जानकारी दिए । स्थिती अहिले सामान्य बनेको छ ।
