हरिवन-विजया दशमीको अवसर पारेर सर्लाहीको हरिवनमा आयोजित भेट्रान्स कपको उपाधि पिप्ले भेट्रान्सले जितेको छ ।
आईतवार सम्पन्न फाईनल खेलमा ट्राईबेकरबाट हरिवन भेट्रान्सलाई पाखा लगाउदै पिप्ले भेट्रान्सले उपाधि बापतको ५० हजार नगद र एउटा बोका हात पारेको हो । प्रतियोगिता अवधिभर दुबै तर्फबाट १–१ गोलको बराबरी भएपछि ट्राईबेकरबाट खेलको निर्णय लिईएको थियो । ट्राईब्रेकरमा रंजन सिन्दालीले गरेको पेनाल्टी प्रहार आकाशिय पछि हरिवन भेट्रान उपविजेतामा खुम्चियो ।
खेलको पहिलो हाफमा हरिवन भेट्रानका खेलाडि विनय बुडाथोकीले गोल गर्दै टिमलाई अग्रता दिलाएका थिए । खेलको अन्तिम सम्म सम्हालिएर खेल्न नसक्दा खेल १–१ को बराबरीमा पुगेको थियो । खेलको अतिरिक्त समयमा पिप्ले भेट्रानका खेलाडि सुनिल घिमिरेले गोल गर्दै टिमलाई खेलमा फर्काएका हुन् । घिमिरे म्यान अफद म्याच घोषित भए । घिमिरे पिप्ले यूवा क्लवका मुख्य प्रशिक्षक समेत हुन् ।
प्रतियोगिताको उपविजेता बनेको आयोजक हरिवन भेट्रानले नगद २५ हजार र एउटा बोका उपहार जितेको छ । गत शनिवारबाट सुरु भएको प्रतियोगितामा १ नम्बर, मधेश र बागमती गरेर तिन वटा प्रदेशका १० वटा भेट्रान्स टोली सहभागि भएका थिए । विजेता र उपविजेता दुवै टोलीलाई प्रतियोगिता समापन समारोहका प्रमुख अतिथि संविधान सभा सदस्य नरेन्द्र साहले पुरस्कार राशी सहित शिल्ड, मेडल र प्रमाण–पत्र हस्तान्तरण गरे ।
हरिवन नगरपालिका–८, सनराईज बोर्डिङ स्कुलको खेल मैदानमा आयोजित प्रतियोगिताको उपाधि स्वर्गिय सिकिल देवीको संझनामा उन्का परिवारको तर्फबाट सौजन्य स्वरुप प्राप्त भएको आयोजकका सुशिल पाण्डेले जानकारी दिए । समापन समारोहमा हरिवन नगरपाकिका मेयर रमेश बुडाथोकी, हरिवन–८, का वडाध्यक्ष प्रज्वल ढुंगाना लगाएतको आतिथ्यता रहेको थियो ।
यस्तै कार्यक्रममा जिल्ला प्रशासन कार्यालय सर्लाहीका प्रशासकीय अधिकृत राजकुमार थापा, समाजसेवी भरत कुमार कार्की, नेपाल पत्रकार महासंघका अध्यक्ष टंक क्षेत्रीलगायतको आतिथ्यता रहेको आयोजकले जनाएको हो ।
