सर्लाही-सर्लाहीमाका थारु समुदायले पनि हर्षउल्लासका साथ जितिया पर्व मनाएका छन् ।
शनिबारबाट विधिवत रुपमा सुरुभएको जितिया पर्व जिल्लाका थारु समुदाय सगैँ तराईमा भब्यरुपमा मनाउने गरिएको छ । जितियाको अवसरमा थारु समुदायको बसोवास रहेको स्थानहरुमा झाँकीसहित साँस्कृतिक कार्यक्रमहरु समेत आयोजना भएका छन् । भने, तराई मुलका महिलाहरुले बिशेष आस्थाका साथ ब्रत र पुजाआजा गरेर मनाउने प्रचलन छ ।
जितिया पर्वको अवसरमा जिल्लाको हरिपुर नगरपालिका स्थित चितायन, लालबन्दी नगरपालिका–३, जब्दी लगाएतका स्थानहरुमा विभिन्न कार्यक्रम आयोजना गरेको जनाएका छन् । जिल्लामा थारु समुदायले उल्लासपूर्ण किसिमले जितिया पर्व मनाएको स्थानीय आशनारायण चौधरीले जानकारी दिए । लालन्दीको जब्दीमा वडा कार्यालयको परिसरमै औपचारिक कार्यक्रम आयोजना भएको थियो ।
नगरप्रमुख बासुदेव अधिकारीको प्रमुख आतिथ्यतामा थारु समुदायको भेषभुषा सहितको झाकी सहित हर्षोल्लासपूर्वक जितिया महोत्सव मनाएको उनीहरुको भनाई छ । कार्यक्रममा वडाध्यक्ष वुद्धदेव चौधरीको अध्यक्षतामा रहेको थियो । आफ्नो समुदायको संकृति संरक्षण तथा नयाँ पुस्तान्तरणको उद्देश्य सहित कार्यक्रम आयोजना गरिएको वडाध्यक्ष चौधरीले जानकारी दिए ।
यसैगरी, ईश्वरपुर नगरपालिका–१४, हरकठवामा जितियापर्वको अवसरमा शुभकामना आदानप्रदानसँगै साँस्कृतिक कार्यक्रम सम्पन्न भएको छ । नगरप्रमुख मनोजकुमार आचार्यको प्रमुख अतिथ्यतामा कार्यक्रम संम्पन्न भएको हो । मेयर आचार्यले आयोजकलाई १० हजार रुपैयाँ सहयोग समेत गरे ।
विशेष विधीका साथ आमाहरुले मनाउने यस जितिया पर्वमा आफ्नो परिवारको कल्याण, आरोग्य, सुख–समृद्धि, सन्तानको दीर्घायुको कामना गर्ने प्रचलन छ । यस पर्वमा समेत अघिल्लो दिन चोखोनितो भएर निराहार व्रत बस्ने र पूजाआजा गर्ने गर्दछन् । थारु समुदायले विशेष रुपमा मनाउने यो पर्व पछिल्लो समय मिथिला क्षेत्रमा पनि व्यापक रुपमा मनाउन थालिएको जानकारहरुको भनाई छ ।
